سلسلة اخترت لكم 20 بشبه عليك

(*) بسم الله الرحمن الرحيم (*)
(*) سلسلة اخترت لكم 20 (*)
وَلَا تَحْسَبَنَّ الَّذِينَ قُتِلُوا فِي سَبِيلِ اللَّهِ أَمْوَاتًا بَلْ أَحْيَاءٌ عِنْدَ رَبِّهِمْ يُرْزَقُونَ (169) فَرِحِينَ بِمَا آتَاهُمُ اللَّهُ مِنْ فَضْلِهِ وَيَسْتَبْشِرُونَ بِالَّذِينَ لَمْ يَلْحَقُوا بِهِمْ مِنْ خَلْفِهِمْ أَلَّا خَوْفٌ عَلَيْهِمْ وَلَا هُمْ يَحْزَنُونَ (170) آل عمران .
إهداء إلى شهداء ثورة 25 يناير المباركة المنصورة بإذن الله في هذا اليوم التاريخي
بشبه عليك
ملامحك من ملامحى
و لونك لونه قمحى
و عيونك فرحانين

بشبه عليك
قولى و فكرنى امتى
أنا شفتك بس امتى
من يوم ولا سنين

يمكن زمايل مدرسه أو دفعتى فى الجيش
خبطت كتافنا يوم فى بعض و احنا فى طابور العيش
و لا أكلنا سوا أكلة سمك فى أبو قير

جايز صليت جنبك فى يوم الجمعه فى الحسين
ولا فى يوم شيلنا العلم فى الأستاد من سنين
و لا لمحتك يوم هنا تصرخ تقول تغيير

بشبه عليك
ملامحك من ملامحى
و لونك لونه قمحى
و عيونك فرحانين

بشبه عليك
قولى و فكرنى امتى
أنا شفتك بس امتى
من يوم ولا سنين

يمكن فى ليله وقفتلى و أنا عطلان ع الطريق
سألت عنى فى يوم و أنا مخنوق حاسس بضيق
سايبنى ليه محتار كده ما تقوللى تطلع مين

هو انت أحمد ولا (هيثم) ولا صوت ملايين - تم التعديل
ولا انت واحد صدره ضاق من الظلم والظالمين
و لا انت باعتك ربنا تاخد بإيد ملايين

بشبه عليك
يا اللي ضحيت بروحك يا واحد مننا
وسايب أهلك وناسك علشانا كلنا
يا شهيد انت مكانك فى الجنه مش هنا

كان نفسى بس أقولك انت مرحتش هدر
دلوقتى صوتنا عالى و خلاص خوفنا انكسر
بقى فيه فى قلوبنا رحمه وليلنا فيه قمر
بشبه عليك . الشاعر أمير طعيمة .